Draghi-skýrslan: Rangar fullyrðingar í Silfrinu
Hjá formanni Sjálfstæðisflokksins gætir mikils misskilnings um Draghi-skýrsluna. Tillögurnar snúast ekki um 700 milljarða evra ríkisframlög aðildarlanda. Skýrslan fjallar um að greiða fyrir einkafjárfestingum innan ESB (Capital Markets and Savings Union) svo fjármagn leiti síður annað.
Í nýlegum þætti af Silfrinu komu fram ummæli frá formanni Sjálfstæðisflokksins varðandi hina svokölluðu Draghi-skýrslu Evrópusambandsins sem rétt er að leiðrétta, enda um mikinn misskilning að ræða.
Því var haldið fram í þættinum að í skýrslunni fælist að Evrópusambandið þyrfti að setja um 700 milljarða evra í atvinnulífið og að sú upphæð myndi leggjast á aðildarþjóðirnar í auknum framlögum til sambandsins. Þetta er rangt.
Meginniðurstaða Draghi-skýrslunnar er sú að auka þurfi einkafjárfestingu innan Evrópu og skapa umhverfi þar sem fólk og fyrirtækin sjálf sjái sér hag í að fjárfesta frekar innan ESB í stað þess að fjármagn flæði í ríkum mæli til Bandaríkjanna.
Til að ná þessu fram leggur Draghi ekki til aukin ríkisframlög, heldur dýpri samræmingu á innri markaði ESB. Þar er meðal annars horft til samræmda eftirlits á fjármálamörkuðum og markvissra hvata til fjárfestinga, vaxtarverkefni sem gengur undir nafninu Capital Markets and Savings Union.
Tillögurnar snúast því um uppbyggingu og samræmingu á markaði fyrir einkafjármagn, en alls ekki um aukin bein fjárframlög úr ríkissjóðum aðildarríkjanna. Nauðsynlegt er að umræðan um Evrópumál og alþjóðahagkerfið byggist á réttum upplýsingum.
